Gürcüstanın Marneuli şəhərindəki “Azərbaycan Evi”nin dəstəyi ilə azərbaycanlı alim Sərdar Yusubovun “Müasir təlim texnologiyaları” kitabının təqdimatı keçirilib.
Təqdimat mərasimində “Azərbaycan Evi”nin direktoru Məhəbbət İmanov professor Sərdar Yusubovun həyatı və elmi yaradıcılığı haqqında məlumat verib.
Sonra müəllif, professor Sərdar Yusubov çıxış edərək bildirib ki, kitabda müasir elmin və pedaqoji təcrübənin nailiyyətləri əsasında təlimin təkmilləşdirilməsinin nəzəri əsasları geniş planda təqdim olunub. Vəsait yeni mövzuları dünya pedaqoji prosesindəki innovasiyaları əks etdirən müasir təlim texnologiyaları ilə zənginləşdirir.
Gürcüstan Elmlər Akademiyasının müxbir üzvü Ketevan Vardanişvili, Gürcüstan parlamentinin sabiq deputatı Ramiz Bəkirov, Azərbaycanın Əməkdar jurnalisti Nizami Məmmədzadə, iqtisadiyyat üzrə fəlsəfə doktoru Tacəddin Quliyev və başqaları çıxış edərək bildiriblər ki, kitab şagird və tələbələrin müasir təlim texnologiyalarından faydalanmasında mühüm rol oynayacaq.
Sərdar Yusubov pedaqoji fəaliyyəti ərzində qabaqcıl təcrübəyə əsaslanaraq “Müasir təlim texnologiyaları” adlı tədris vəsaitini tərtib edib. O, həmçinin etnopedaqogika elm sahəsi üzrə ilk mütəxəssisdir.
Bu vəsait pedaqoji universitetin məzunları, magistrantlar, doktorantlar, ümumtəhsil müəssisələrinin müəllimləri və ali məktəblərin pedaqoji fakültələrinin təcrübəçi müəllimləri üçün nəzərdə tutulub.
Gürcüstanın Təhsil və Elm Nazirliyinin müvafiq qərarı ilə tədris vəsaitinə rəy verilib və onun təhsil müəssisələrində istifadə olunması tövsiyə edilib.
