İran Körfəz regionunda bir neçə strateji obyektə zərbələr endirib.
Bu barədə Bəhreyn Krallığının Daxili İşlər Nazirliyi sosial şəbəkədə məlumat yayıb.
Məlumata görə, hücum Bəhreynin Müharraq vilayətində yerləşən yanacaq bazasına edilib. Bildirilib ki, zərbənin hədəfi əyalətdəki obyektlərdən birində yerləşən yanacaq çənləri olub. Hadisə ilə bağlı araşdırmanı səlahiyyətli qurumlar aparır.
Eyni zamanda, İranın İslam İnqilabı Keşikçiləri Korpusu (SEPAH) Fars körfəzi ölkələrində yerləşən bir sıra obyektlərə zərbələr endirdiyini açıqlayıb.
SEPAH-ın məlumatına görə, hücumlar Birləşmiş Ərəb Əmirliklərində yerləşən Fuceyra limanının neft zonasına və Şarja şəhərinin sənaye bölgəsinə yönəlib. Hədəflər arasında Küveytdə yerləşən ABŞ-ın Əli əl-Səlim aviabazası da göstərilib.
İran tərəfi bildirib ki, bu zərbələr ABŞ və İsrailin yaxın günlərdə Tehranda neft bazaları və neft emalı obyektlərinə endirdiyi hücumlara cavab olaraq həyata keçirilib.
SEPAH-ın iddiasına görə, peyk görüntüləri regionda hərbi infrastruktura xidmət edən üç strateji obyektin zədələndiyini göstərir.
