Xətayi rayonu Cavanşir küçəsi 27 ünvanında yaşıllıq məhv edilir.
Bu barədə Qaynarinfo-ya Xatayi rayon sakini Anar İsmayılzadəməlumat verib.
"Minimum 12 ağac artıq çıxarılıb. Kimlərsə həmin yerdə obyekt tikir. İcra Hakimiyyətinə, Ekologiya və Təbii Sərvətlər Nazirliyinə müraciət etmişik, amma heç bir xeyri yoxdur. Artıq 2-3 günə həmin ərazidə obyekt tikintisi yekunlaşacaq. Guya deyirlər ki, icazəmiz var və həmin ağacları aparıb başqa bir yerdə əkəcəyik. Bu böyüklükdə, həmçinin üzərində meyvə olan ağacı, yayın istisində aparıb hardasa əkmək olarmı?! Xahiş edirik ki, aidiyyatı qurumlar bu məsələ ilə maraqlansınlar", - deyə o bildirib.
Məsələ ilə bağlı Bakı Şəhər Yaşıllaşdırma Təsərrüfatı Birliyinin Bitkilərin mühafizəsi şöbəsinin rəisi Orxan Məmmədov ilə əlaqə saxladıq. Qurum rəsmisinin sözlərinə görə, Ekologiya və Təbii Sərvətlər Nazirliyi sözügedən ərazidə ağacların çıxarılmasına dair rəy verib:
"Nazirliyin Ekspertiza idarəsi ağacların köçürülməsinə görə rəy verib. Səhv etmirəmsə Ramana ərazisinə köçürülür. Həmin yerdə cəmi bir ədəd böyük ağac var idi, qalanları balaca ağaclar idi. Suvarma ilə təmin olunmuş yerə köçürülürsə, heç bir problem yoxdur".
